معلومات مفيدة للرشاقة (تجربتي الخاصة)

مرحبا اخوان بس حبيت اشارك وياكم معلومات مفيدة جدا للتخلص من الدهون الي بالجسم وخصوصا في منطقة البطن..... اني سويت اهواية بحوثات ابهذا الموضوع علة الانترنيت وطلعت ابفد مجموعة حلوة ومفيدة للتخلص من الكرش والدهون الزائدة واني شخصيا جنت سمين وعندي كرش مو طبيعي ههههههه بس الحمد لله هسة ياهو الي ايشوفني ميصدك بية عبالة مو اني لان خلال فترة اقل من شهرين نقصت حوالي 15 كيلو وهسة جسمي مو طبيعي Very Happy

الحاصل راح اكلكم فد نصائح بسيطة اتبعوهة ومتخسرون....
أولا البرنامج الغذائي الصحي
اهم شي الاكل الصحيح ولو اكلنة بالعراق كلة غلط بس شنسوي قدر الامكان نبتعد عن الاكلات البيهة دهون اهواية مثل التمن والي هوة يعتبر من الاكل الرئيسي عدنة بالعراق واذا واحد مدمن مال تمن وميكدر بدونة خلي ياكل تمن مميدم(بدون متخلون عليه دهن) يعني كول الامك او الزوجتك لتيدم التمن واذا تبتعد عنة بعد احسن وانتو بعد تعرفون الاكلات البيهة دهونات اهواية ميحتاج اكلكم عليهة هاي نقطة ...... النقطة الثانية هية اشرب مي اهواية بس مو وية الاكل يعني قبل الاكل اشرب مي اوكي دير بالك تشرب مي وية الاكل وبالاضافة الى انو شرب المي بكثرة مفيد جدا لان ايكلك مرات دماغ الانسان يختلط عليه الجوع والعطش فة من تشرب مي اهواية باليوم راح ايقل احساسك بالجوع ..... النقطة الثالثة والمهمة وهية انو تاكل خمس وجبات باليوم ...... هسة اتكولون هذا غير رجيم خمس وجبات باليوم بس صدكوني مثل ما اكلكم بس شنية الوجبات وشوكت تاكلهن
الوجبات هنة الريوك والغدة والعشا وبين الريوك والغدة سناك وبين الغدة والعشة اسناك ( اسناك يعني وجبة خفيفة) يعني لحم معلبات هذا مال دجاج او جبناية وزلاطة من هل امور

اول شي نجي علة الريوك والي هوة اهم وجبة دير بالك اتعبرة يعني لازم تتريك والافضل انو تاكل بالريوك بيضتين سلك بدون صفار او وياهة طماطة وخيار واذا اتريد اكل ويا كورن فليكس وحليب خالي الدسم ..... حاول لتشرب جاي الصبح او بالاحرى لتشرب جاي ابد اشرب قهوة ويفضل انو اتكون سادة بدون شكر يعني ابتعد عن السكريات (الشكر والحلويات بأنواعها) وبما انو الجاي مينشرب مر فة اشرب ابمكانة قهوة كلش مفيدة اليكلك القهوة متفيد ومن هل حجي كلة معليك سام ايكول اتفيد ههههههههه والدليل علة هذا شوفو الامريكان اول ميكعدون من الصبح ايشربون قهوة لان صحية واتساعد علة التنبيه وايضا تساعد بنسبة قليلة على حرق الشحوم.
الغدة مثل مكلنة حاول لتكال تمن حاول تاكل صدر دجاج رخيص وطيب شوي شوف شتسويلة المهم اشلون متسوي طيب ومفيد او ويا اكل زلاطة الزلاطة كلش مفيدة بيك ما بيك اكل زلاطة والخضروات ابصورة عامة اوكي
نجي علة العشة هم حاول تاكل فد شي بسيط يعني هل موجود بالثلاجة هههههه وفواكه يعني العشة دائما خلي خفيف
هسة صارن عدنة خمس وجبات سهلات وبسيطات بس اهم فقرة انو العشة مالتك ايصير قبل الساعة 8 ورة ال 8 لتاكل شي بس اشرب مي لان ورة الساعة 8 بعد ماكو هظم بالجسم الاكل التاكلة كلة ايضل بالمعدة ميتوزع علة الجسم بس اذا اتريد اكلك تفاحة وحدة بالليل يومية اتفيد كلش ..... واذا اي واحد عندة سؤال ابهذا الخصوص اني جاهز
هسة خلصنة من الاكل واذا اتريد خليلك فد يوم بالاسبوع اعتبرة اجازة اكل اي شي اتريدة ابراحتك يوم واحد فقط حتة لتنحرم من الاكل الي اتحبة ..... نجي علة التمارين والي هية فد شي كلش بسيط
اول شي الركض ..... الركض كلش مفيد يعني حاول يومية تركض فد عشر دقايق راح اتشوفهة صعبة بالبداية بس وراحة راح اتكوم اتزيد تلقائيا يعني مراح اتشوف نفسك الة دتركض ثلث ساعة نص ساعة بدون تعب يعني اشوية اشوية العافية درجات بالاضافة الى المشي يعني يومية علة الاقل امشيلك نص ساعة كلش اتفيد لان المشي افضل رياضة للقلب ومن تمشي راح اتحس ابراحة مو طبيعية يعني اني مرات اكل اهواية يعني اكل طيب شسوي هههههه كبل وراهة اروح اتمشالي اشوية وارجع حتة اصرف الاكل الي اكلتة اوزعة علة الجسم ما اخلي ينخزن بالمعدة ...... هسة كلنة الركض والمشي نجي علة تمارين البطن وهية ما اقيدك بيهة شتسوي سوي بالبيت يعني هاي التمارين المعتادة مال بطن اعتقد الكل تعرفهة ... واهمها التمارين الي بالصور

معلومات مفيدة للرشاقة (تجربتي الخاصة) 508535678

هذا تمرين كلش مفيد مثل البايسكل بس انتة ونايم اتخلي ايديك ورة راسك وتثني رجلك اليمنة واتمد رجلك اليسرة وأطخ عكس ايدك اليسرة وية رجلك اليمنة وبالعكس بس رجليك ارفعهن من الكاع اشوية كما موضح بالصورة اعلاه.... سوي 40 او 50 هل تكدر عليه وارتاحلك فد 30 ثانية وعيد التمرين

معلومات مفيدة للرشاقة (تجربتي الخاصة) 130546619

معلومات مفيدة للرشاقة (تجربتي الخاصة) 130546619

هذا التمرين هم مفيد والي هوة انو اتنام علة الكاع اتخلي ايدك علة جتفك او ورة راسك واتكوم بأتجاه رجليك بحيث العكس مال اديك ايطخن بألافخاذ وكرر العملية كما موضح بالصورة اعلاه وهم سوي هل تكدر عليه
هاي هية اهم تمارين البطن.

او اكو بعد جم شغلة الي هية انو تبتعد عن الاشياء التالية:
المشروبات الغازية وخصوصا الببسي
المعجنات بانواعها
المايونيز
المكسرات
الموطة
الحلويات بأنواعها
وحاول اذا تكر يعني شغلة مو اجبارية بس احسن انو تاكل خبز مال سكري لتاكل الصمون والخبز الابيض اكو هذا اللوف طيب ورخيص وشكلة حلو ههههه بس اهم شي اخذة مال دايت يعني مال سكري
ولو اني طولت عليكم بس هاي هية اهم الامور للتخلص من الوزن الزائد والحصول على جسم رشيق وحلو اني جربتهن وصرت اخبل Very Happy

وتدللون

هاي شنو عصام صاير خبير بالتغذيه ومدرب بس والله احسن شي الواحد يلتزم بالي تكوله ......... هاي اذا كدرنه نلتزم

معلومات مفيدة للرشاقة (تجربتي الخاصة) 288284470

ههههههههههه اي شسوي لعد سويت بحث بألانترنيت لما كلت بس حتة اخلص من الكرش والدهون الزايدة وفعلا جبت نتيجة وترة الشغلات الي كلت عليهة كلش بسيطة ومفيدة ابنفس الوقت يعني مو شغلات تعجيزية او فد رجيم بحيث متاكل شي...... اهواية ناس عبالهة الرجيم انو متاكل اهواية ومتتعشة لا بالعكس اصلا الاكل لهواية ايساعد علة الهضم وبالتالي مراح ايضل اكل مخزون بالمعدة ويتحول الى شحوم بس اكل قليل يعني مثل ما ذكرت اني بالموضوع انو تاكل خمس وجبات باليوم بس اكل مابي دهون او وجبات قليلة ابهيجي حالة راح اتضل شبعان طول اليوم ومرتاح نفسيا وطبعا هذا الحجي مو من عندي هذا الحجي نتائج وخلاصة البحث مالتي وجبت هاي المعلومات من مدربين مختصين ابهاي الامور ..... اخر شي اكولة الكم انو بس واحد يعزم انو يلتزم راح يلتزم لان ماكو احلى من الرشاقة والجسم الصحي وحاولوا قدر الامكان انو تلتزمون بألي كلتلكم عليه لان راح اتلاحظون اهواية فرق ..... اتمنالكم التوفيق

» معلومات عن الولايات المتحده الامريكية معلومات عن امريكا
» معلومات عن حساس الاوكسجين
» معلومات علمية عن مثلث بيرمودا